۲۱ آذر نصضتینين ۵۹-ينجی ايل دونومو مناسيبتی له
هاشم ترلان
21آذر و پيشه وري (1)
(پوئمادان پارچالار)
توتوب غددار اتهييندن من زامانين
چوخ يانميشام بير آرزونون حسرتينه.
خلقيم دئيه،شمع تك يانان بير انسانين.
رسام كيمي جيلوه وئرهم صورتينه.
هرجبهه نين بايراقداري او رهبرين،
يئری بوشدور چوخ شاعرين دفترينده.
دار آياقدا ايلهامچيسي هر سنگرين،
نقش اولونسون اديبلرين اثرينده.
جاوان واختي قوجاقيندا مئشهلرين،
گلديم دئدي، تاليشلارا، گيلكلره.
كسمك اوچون ناحقلرين ريشه لرين،
ال اوزاتدي كؤمك اومان ديلكلره.
هجر كيمي ايگيد آنا دوغدو اونو،
دئدي:دردين قوي قاريشسين ائل دردينه.
بيلمهسنده شادليغين نه اولدوغونو،
رحم ائيلهمه هر دؤورانين نامردينه.
بولوتلاردان چاخان زامان ايلديريملار،
او گوز اوجو باخيب گولدو زيندانلارا.
قيشدا توفان، ياي چاغيندا ايستي قوملار،
محبتين کسنمهدی اينسانلارا.
وطن دئدي او گؤز يومدو عيش- نوشدان،
غربتدهده جان سؤيلهدي دوستا، يارا.
آراز اوسته اؤتوب کئچن قارانقوشدان،
دئدي:مندن سالام آپار اوبالارا،
سالام آپار آنا يوردا بيلسين كي من،
آيريليغين حسرتيندن داش اوستهيم.
دوغرودوركي اوتاي وطن، بوتاي وطن،
سنسيز يئنه هارادا اولسام قفسدهيم.
سالام آپار سؤيله مندن قوچ تبريزه ،
ائشيديرم قولونداكي زنجير سسين.
آراز نئجه درين اولسا اوزه – اوزه ،
گلهجهيم هئچده دوشمن سئوينمهسين....
سن اؤلنده تاّسوفلر كؤلگه سالدي ،
قالدي ائلين باخيشلاري يوللاريندا.
سون نفسده يانا-يانا گؤزون قالدي،
بو تايلارين خزان وورموش باهاريندا.
باغبان اولدون گيردين باغا گوله-گوله،
بير گول اكدين غنچه لندي گول آچمادي.
سازگؤتوروب نغمه دئدين بيزيم ائله،
افسوس اولا ساری سيملر ديل آچمادی.
سن آنادان اولان گوندن،
انقلابچي ياراندين سن.
عصيان ائتدين قارانليغا،
دوشمن اولدون فرعونلوغا.
هرطرفده ستم گؤردون،
ظولم اليندن ماتم گؤردون.
گئتدين خلقين كؤمهيينه،
چاره ائتدين ديلهيينه.
قلم چالدين سولا- ساغا،
شاهلار دوشدو ال-آياغا.
سونگو اولدون دار گؤزلره،
سالام دئدين گوندوزلره.
ائللر گلدي سوراغينا،
گؤز تيكديلر بايراغينا.
باخيب سنه جان دئديلر،
گونش كيمي يان دئديلر.
هاراي سالدين جار ائيله دين،
آزادليغي وار ائيله دين.
قيندان چكيب قيلينجيني.
نشان آلدين شاه تاجيني.
انگليسلر هوروشدولر،
آمريکایلا گوروشدولر.
بويلانديلار بيزيم يوردا ،
وار دئديلر خطر بوردا .
سن آتيني چاپا-چاپا ،
هئچ باخمادين بو هاپ-گوپا،
آذر آيي گليب چاتدي ،
فدائيلر آت اويناتدي ،
وطن اولدو غمدن اوزاق ،
داستانيمين آردينا باخ .....
آذر آيي! نه گؤزلدير آدين سنين،
من وئرهرم سني عؤمروم آنلارينا.
گليشينله چيچكلندي بو وطنين،
شهرت اولدون بيزيم اودلار ديارينا.
آذر آيي! سن اوخ اولدون ياد گؤزونه،
شفقلرين گئديب چيخدي واشنگتونا.
دومان چؤكدو آج لوردلارين گوندوزونه،
چاققال كيمي اولاشديلار يانا-يانا.
رهبر يميز قلم چكدي اون بير آيا،
دئدي آذر كؤرپو اولسون آل سحره.
ايگيرمي بيرآذر گونون سايا-سايا،
قيزيل خطله يازدي سني تقويملره.
چاخدي شيمشك،بولوتلاردان ياغدي ياغيش،
جوشد و سئللر شاققيلدادي گئن دره لر.
باش قوزادي گوي چمنلر قاريش-قاريش،
آچدي قوينون بيزه باغلي پنجرهلر.
«سهند باخدي آغ بير چكلي «ساوالانا»
گوردو گولور،حنا ياخيب اللرينه.
آل گونش ده كناريندا يانا-يانا،
سيغال وئرير اونون قارا تئللرينه.
نظر سالدي دادلي، دوزلو گؤي خزره
«اورمي گؤلون» گؤردو گليب موشتولوغا
آسماندا ايزن وئريب شوخ قمره
سلام دئسين بو بايراما، بو دوستلوغا.
شادليغيندان خان آرازدا با خيب يوردا،
گؤز ياشيني نثار ائتدي بو تايلارا،
انصاف دئييل سولوم آزاد ، ساغيم داردا،
آلقيش اولسون محبته، دوز ايلقارا.
حيات گولدو ، چيچكلندي آذربايجان،
فيرقه آچدي دوگونلنميش بوحيكمتي.
رهبريميز پيشه وري اولدو باغبان،
بودور بيزه فيرقهميزين عظمتي.
سونا يئتدي باشيميزدان قاخينتيلار،
پاسلي قيفيل پارچالاندي دوداقلاردان.
نغمه دئدي ساز الينده "حسين جوان "،
توستو چيخدي سؤنوك قالميش اوجاقلاردان،
وجده گلدي شاعرلرين باتان سسي،
شعرلري آينا اولدو فيرقه ميزه .
ايلمه چالان گؤزللرين ترانه سي ،
فرح وئردي قاطارلانميش جرگه ميزه.
جار چكيلدي شهرلره، اوبالارا،
سس وئريلدي ائلين سئون وكيللره.
ملي مجليس شفق ساچدي بو ديارا،
آرخالاندي آذر آدلي نسيللره.
قدم قويدو ايگيد اولان بو مجليسه،
وطن دئيه آند ايچديلر بو تورپاغا:
كوراوغلو تك ، اجلافلاري كسه-كسه،
لقمان كيمي گيرهجهييك هر اوتاغا،
نطقه گلدي بو مجليسده پيشهوري،
ائل درديله آلوولانان فرزانه ميز.
منده گوردوم دانيشاندا او رهبري،
دئديم : تازه بابك دوغوب زمانه ميز.
دئدي :دوستلار! قولاق وئرين سوزوم چوخدور،
يوردوموزون كؤز باغلاييب يارالاري.
بوندان آرتيق خلقيميزده دؤزوم يوخدور،
آدام سايسين فرعونلاري، دارا لاري.
نسيل-نسيل سورونموشوك بو اؤلكهده،
حق سؤزوموز خوش گلمه ييب حاكيملره.
جلاد كيمي آدديملايان هر كؤلگه ده،
راست گلميشيك فرمانلارا، تحكيملره.
هر كيم يالان اويدورمالار ياخسا بيزه،
ايران ايله قيريلمازدير ايلقاريميز.
اگر تهران بير قول كيمي باخسا بيزه،
بو مجليسين قدرتیدير شعاريميز.
نور ساچيلدي بو مجليسين شعله سيندن،
مختاريت عشقي ايله يانانلارا.
قوي عار اولسون ! اوجا سسله دئيير وطن،
بو تاريخي، بووارليغي دانانلارا.
بؤهتان دئمك بير نهضته آسان دئييل،
سسيميزه سس وئريبدير خلقين سسي.
قوي ائشيتسين بوتون عالم : شايان دئييل،
فيرقه ميزه تجزيه ليك افسانه سي.
ائل ياپيشدي بو مجليسين اتهييندن،
گولدو سولان قلبيندهكي مورادلاري.
اوفوقلردن اسن باهار كولهييندن،
الهام آلدي كؤنوللرين قانادلاري.
بو باهارين كئشيكجيسي، ملي قوشون،
اله آلدي ستارخانين توفنگيني.
سنگر ائتدي آنا يوردون داغين- داشين،
عدالت ده تاپدي بوردا اؤز رنگيني.
عوض اولدو تمليندن قديم نظام ،
چيرمالاندي يئني دونيا يارادانلار.
آنا وطن اؤز قوينونو آچيب تمام،
دئدي گلين اورهييمده چوخ يارام وار.
ستارخاندا باش قوزايب مزاريندان،
گيلئيلندي بو ائللرين شان، شرفي.
دئدي:منيم آديم ايله بير خيابان
ياراشارمي توزلو قالا هر طرفي؟
تبريز آچدي گؤزلريني بيرگون سحر،
گؤردو گولور آيناكيمي خيابانلار.
دان يئري تك پاريلدايير گئن كوچه لر،
گؤيدن باخير يئر اوزونه آسمانلار.
قارا آسفالت تؤكولدوكجه هر ميدانا،
قوجا تبريز جوانلاشدي بيرآنليقدا.
خبر چاتدي قلبي سؤنوك او تهرانا،
كور وجداني يانيب ،باتدي قارانليقدا.
نازلانديقجا گلين كيمي دوغما شهر،
داراخ ديدي مين طرفدن ساچلارينا.
چيخدي ياسدان خومارلاندي گولن گؤزلر،
باخدي اركه، قوينونداكي اؤز يارينا.
لوطولاردان نه ايز قالدي ،نهده اثر،
گؤزدن ايتدي الي قمه ،چوماقليلار.
تنگه لرده باج آلانلار ، باج وئرنلر،
کور رحيم تک حرامیلر يوخ اولدولار.
قارني ييرتيخ كاظم گئتدي دارباشبنا،
عبرت اولدو الي ايري گزنلره.
آچيق آيدين،خلقي سويان اؤز خوشونا،
سونا بيتدي،اورهك سيخان بو منظره.
يئرين وئردي قارانليقلار آغ گوندوزه،
امن- اماندان نفس چكدي بوتون يوللار.
بير مثل ده بابالاردان قاليب بيزه:،
باشا قيز يل آليب دولان ديار-ديار.
دئموكراتيسم قاناد وئردي قانونلارا،
دوزگون يولا دوشدو بوتون اداره لر.
حق وئريلدي حق دانيشان انسانلارا،
پارچلاندي سرنيزه لر، قداره لر.
۲۱ آذر نهضتینين ۵٩- ينجی ايل دؤنومو موناسيبتیله
هاشم ترلان
فيرقهميزين قدرتيندن،كئچميشلرين،
پاس باغلاميش چرخي گلدي حركته.
كندلي خيشين ووردو يئره درين-درين،
گلدي تاخيل،چورهييميز بركته.
اكينچيلر اوزون زامان قلبينده داغ،
يئر شوملادي بي، خانلارا اقبال دئيه.
ميليون ايلليك بير قانونو سينديراراق
ميللی دولت تورپاق وئردی اکينچیيه.
دونيا علم - صنعت دئيه اوچان دمده،
بوغولوردو جهالتده آذربايجان.
فيرقه آچدي عالي مكتب اؤز اؤلكمده،
قوجا تبريز بير گول آسدي ياخاسيندان.
او زامانلار مكتبليلر ايلكين دفعه،
نان يئرينه، چورهك يازدي دفترينه.
سئوينجيندن باخا- باخا هرطرفه،
گؤزون تيكدي صاباحين آل سحرينه.
دئديم:آنا سنده اوخو، دئدي:بالا!
ديليم ياتمير ديليمه ياد اولان ديله.
هانسي ديلدير چوخ سئوديگين!گلدي حالا،
من عاشيغام سنه لايلا چالان ديله.
آنا ديلده من كتابين نشان وئريب،
-بويورآنا: بودا سنين دوغما ديلين.
نملي گؤزلرباخدي منه، او كؤوره ليب،
گوله-گوله ساچلاريما چكدي الين.....
شر يارادان طفييليلر داراخلاندي.
هرگوشهده حكم ائيلهدي بير انتظام.
كهنه قانون ،كهنه نظام واراقلاندي،
مژده وئردي گلهجكدي يئني ايام.
كارگرلر بيرلشديلر شورالاردا،
امك، قايغي جوانلاشدي بيلكلرده.
شفا تاپدي كؤز باغلايان يارالاردا،
حبات عشقي تازه لندي ديلكلره.
توي پالتارين گئيب بيزيم مشكين شهر،
فدائيلر كوچه لرده دسته-دسته
قاراداغين شوخ گليني نازلي اهر،
سانكي سحر دامجيسيدير يارپاق اوسته.
اولدوز كيمي او سايريشان سهنده باخ،
وسمه چكير ماراغانين قاشلارينا
اورميهنين گؤزلرينده يانير چيراغ،
«آزادوطن»كئشيك چكير ائل وارينا.
ديقتله باخ! او بختآور مرنده سن.
گوندوز چاليب، گئجه لره اؤز رنگيني.
يولون دوشه او ديارا گلنده سن،
ائشيدرسن سعادتين آهنگيني.
خويدا آچيب ياشماغيني گولوربيزه،
دئيير باخين نه خان قاليب، نه امنيه.
خار يئرينه بنفشهلر چيخيب ديزه،
قوردلا، قويون باهم گزير الفت دئيه.
بير گون سحر دان يئرينه دوشنده لك،
كؤنوللري سالاملادي ائل نغمه سي .
ايلكين دفعه كوراوغلونون نعرهسي تك ،
دالغالاندي راديوموزون مغرور سسي.
قربان اولوم شوخ ديلينه دانيش تبريز،
دئيلمهميش سؤزون چوخدور بيلير هامي .
دونيا اولسون شوكتينله تانيش تبريز ،
آلقيشلاسين سندهكي بو احتشامي .
زينت وئردي جلالينا آذر آيي،
ايگيرمي بير، قلم چكدي رذالته.
ييرمي دؤردون اولدوزلارا بنزر آيي،
تاريخ اولدو ،شهرت اولدو بير ملته.
بختيم كيمي گولومسهدي اينجه صنعت ،
سوسان ، غملي صنعتكارلار ديله گلدي .
آچدي قوينون صنعتکارا ملي دولت ،
كويئگيندن چيخان سازلار ديله گلدي.
آرزولارا قاناد وئردي فيلارمونو،
«سازچي قيزلار» سوزوب گلدي دسته-دسته.
وطن آتدي ،اگنيندهكي كهنه دونو ،
گؤيرچينلر ماهني دئدي داغلار اوسته.
لاله باخدي بوينو بوكوك بنفشهيه،
دئدي سنده بو داورانيش ندن بئله؟
نظر ائيله باغچاداكي هرگوشه يه،
ساري بولبول نغمه دئيير گولدن-گوله.
آي قيز «مريم» آز باخگينان او گوزگويه!
فلارمونيا بايرام ائديب شعريتي.
باخدي مريم ،گؤردو «رضوان » «سنسيز»دئيه،
خوش سسيله حئيران ائديب طبيعتي.....
* * *
دومان گلدي،گونش باتدي، شر دوغولدو،
آنا يوردون گؤزللري ياسا دولدو،
اؤلندهده وطن سؤزو شعار اولدو،
«جاويدان»تك هرشهيدين دوداغيندا.
«ابراهيمي» عينالييا باخا-باخا،
دئدي اؤللم،آنام مني ببرده دوغا.
وارليغيما بولوتلاردان شيمشك چاخا،
باش اگمهرم فرعونلارين قاباغيندا.
شهيدلرين جرگهسينه جانان گلير،
«خليل»دايي چون بابك زمان گلير،
ائل دردينه يانماق اوچون انسان گلير،
خلقيميزين يانديرديغي اوجاغيندا.
«يکاني»ني سون نفسده بوغدوقجا كين،
دئدي:خلف ائولادپيام من بابكين،
اؤلسمده من پارلاياجاق گونش تكين،
عمللريم آزادليغين چيراغيندا
او داد چكدي:من ژنرال عظيمييم،
آند ايچميشم،مسلكيمده نسيمييم،
توفانلارين قارشيسيندا داغ كيمييم،
دايانميشام فيرقه ميزين داياغيندا.
«تقي زاده»دارآغاجين حقير ساندي،
گئنيش قلبي غضبلنميش بير عماندي.
او سون دمده وطن دئدي، وطن آندي،
گؤزون يومدو آنايوردون قوجاغيندا.
نعره چكدي بيزيم«سريه»اولدوزي،
دئدي:منم شاهسئوهنين هجر قيزي،
ايگيد ائللر آلاجاقدير قانيميزي،
صاباح دوغان انقلابين آياغيندا.
من«صبحي»يم قوي ياشاسين بيزيم ديار،
دويوشلرده ائنيشده وار،يوققوشدا وار،
من اؤلسمده ائولادلاريم صاباح ياشار،
اسيب، گلن آل سحرين سازاغيندا.
من شاعرم«نيك نام»ديرآديم،جلاد،!
وطن عشقي اورييمده آچيب قاناد.
اؤلوم نهدير!اودا منه باشقا حيات،
فقط كؤنلوم سيزيلدار ائل سوراغيندا
* * *
ارك قلعه سي ايندي سويله ندير سوزون؟
او دؤوراني،او گونلري گوردون اؤزون،
جار ائيلهرم بو دونياداسؤزون دوزون:
وطن يانير شهيدلرين فراغيندا......
* * *
شاعر نچون دايانميسان؟ ياز! قلمين
جارچي اولسون اؤزگوردويون شاد گونلره.
شاه اليله پردهلنميش او عالمين،
حقيقتين، تاريخ دئيه ياز دفتره.
ياز سؤزلرين دؤنسون دورنا قاطارينا،
الين سيخسين هيجرانداكي كؤنوللرين.
قدم قويسون پيشه وري مزارينا .
آلقيش دئسين حق سايينا، او رهبرين.
ايللراؤتوب جالانديقجا عصيرلره،
ياشاميشام اؤز ائويمده قوناق كيمي.
مغلوب تكي بنزه ميشم اميرلره،
دارگؤزلره گؤرونموشم ياماق كيمي.
قوي سانماسين دونيا مني لال اولموشام:
ياخود الي شمشيرلييه باش اگميشم.
من طوفانلار قوجاغيندا دوغولموشام،
من عصيانام، من وولقانام، بودور پئشم.
اوستاد احمد شایا (آلاو)ون جنازهسی تورپاغا تاپشیریلدی
گؤرکملی آذربایجان شاعر و یازیچیسی اوستاد احمد شایا (آلاو) ون جنازهسی جوما گونو ساعات 14 ده، کرج شهرینین امامزاده طاهر مزارلیغیندا تورپاغا تاپشیریلدی. اوستادین جنازهسی نئچه یوز نفرلیک بیر حضورلا مزارلیغا قدهر مشایعت اولوندو. مزار باشیندا شاعر و یازیچیلاریمیز اوستاد حاقدا اورهک سؤزلرینی دئیهرک، بو ایتگینی ادبییاتیمیزا بؤیوک بیر ایتگی کیمی قئید ائتدیلر.
تورپاغا تاپشیرما مراسیمینده شاعر و یازیچیلاریمیزدان هاشیم ترلان، حبیب فرشباف، علیایی، سؤنمز، حسین صدیق (دوزگون)، روشن خیاوی، ناظر شرفخانه ای، آذرمازندرانی، نسیم، حسن ایلدیریم، کاویان، آذرائللی، چاپار ، شکوه شکوری (آنا)، ایشیق، محمد فاتح، ائلدار موغانلی و م.وطن، اوستادا حصر ائتدیکلری اثرلرینی اوخویوب، اوستادین عائیلهسینه باش ساغلیغی وئردیلر.
عینی حالدا ساهر، صابر و نباتی ادبی انجومنلرینین ، همچنین مطبوعات اورگانلاریندان آذری، خداآفرین و بهارزنجان اوچ آیلیق، آیلیق و هفتهلیک درگیلرینین بیانیهلریده اوخوندو.
تورپاغا تاپشیرما مراسیمینده اوخونان ادبی انجومنلر و مطبوعات اورگانلارینین مشترک بیانیهسینی آشاغیدا تقدیم ائدیریک:
============
گؤرکملی آذربایجان شاعر و یازیچیسی
اوستاد احمد شایا (آلاو) ون ابدی خاطیرهسینه عشق اولسون
سادهجه شاعرم شعیر دفتریم،
قهرمان ائلیمین قوجاغیندادیر.
خالقیما یازدیغیم نغمهلی سؤزلر
دائیما ائلیمین دوداغیندادیر.
اورهییم باغلیدیر آنا وطنه،
وطنین عشقیدیر روح وئریر منه.
نعشیمی بوکنده بیر گون کفنه
ابدی یاتاغیم تورپاغیندادیر.
دئمیرم باشیمی اولدوزا یئتیر،
یادا کی اونودوب، آدیمی ایتیر.
مومکونسه شعریمدن بیر چیچک بیتیر،
گووهنیم بیر گولوم ائل باغیندادیر.
ائلیمیزین غئیرتلی، شرفلی اوغلو، یوردوموزون آدلی- سانلی ائل دردین چکن و وطن اوچون بوتون وارلیغینی اسیرگهمهین شاعر، یازیچی، ادبییاتشوناس و دیلچی عالیمیمیز اوستاد احمد شایا (آلاو) ون دونیادان کؤچمهسی بیز دوستلارینی و شاگیردلرینیده سارسیلتدی. بو نیسگیللی ایتگییالنیز ادبی جمعیتلریمیز اوچون یوخ، بوتون آذربایجان مدنیتینه ایتگی حساب اولونور.
آذربایجان خالقینین بو زحمتکش صنعتکاری و بیر اینسان عؤمرونو یالنیز آذربایجان سؤزلویونو یاراتماقدا صرف ائدهن دیلچی عالیمینین شرفلی خاطیرهسی همیشهلیک یاشایاجاقدیر. صنعتکارین دیلچیلیک حیصهسینده یازیب یاراتدیغی اثرلرینین ایشیق اوزو گؤرمهمهیینه باخمایاراق، یاییلان اون جیلده یاخین شعر و ادبییاتشوناسلیق مقالهلری، آذربایجان ادبی- بدیعی خزینهسینه بخش اولونان چوخ دیرلی اینجیلردیرلر.
بیز ادبی انجومنلر و مطبوعات اورگانلاری ایشچی و مودورلری بو نيسگيللي ايتگيني آذربايجان خالقينا، ديليميز، ادبيياتيميز و مدنيتيميزين اوغروندا چاليشان اينسالارا ، بوتون ادبي و مدني جمعيتلره ، خصوصييله اوستاد آلاوون محترم عائيلهسينه باش ساغليغي وئريب، اونلارا صبير ديلهييريک.
ازلدن بئلهدیر چونکی کائینات،
جاهان دائیمیدیر، عؤمور آمانات؛
الدن اله کئچیر وفاسیز حیات
بیز گلدی- گئدهریک، سن یاشا دونیا!
انجمن ادبی ساهر – انجمن ادبی صابر – انجمن ادبی نباتی – فصلنامه آذری – ماهنامه خداآفرین – هفتهنامه بهار زنجان
آجی خبر
آجی خبر
ساهر ادبي انجومنينين آقساققالي
اوستاد احمد شايا (آلاو) ابدييته قوووشدو.
يئنه ده آذربايجان خالقي، ديليميز و مدنيتيميز اوغروندا بوتون عؤمرونو صرف ائدهن غئيرتلي بير بالاسيني ايتيردي.
يئنهده ادبي ايجتماعياتيميز َسارسيلماز بير عضوونون اؤلوم ماتمينده ایلشدي.
پنجشنبه گونو مهر آيي نين 23- ينده کرج شهرينده ياشايان گؤرکملي آذربايجان شاعر، يازيچي، ادبياتشوناس و ديلچی عاليمی, سون ايللرده بير آق ساققال کيمي ساهر ادبي انجومنيني اؤز گؤستريشلري له دوز يولا يؤنلدن، قوجامان اديب اوستاد احمد شايا (آلاو ) ، اورهک خستهليیی نتیجهسینده دونياسيني دييشيب، ابدييته قوووشدو.
بو نيسگيللي ايتگيني ساهر ادبي انجومنينين عضولري و ايداره هياتي آديندان آذربايجان خالقينا، ديليميز، ادبيياتيميز و مدنيتيميزين اوغروندا چاليشان اينسالارا و بوتون ادبي و مدني جمعيتلره و خصوصييله اوستاد آلاوون محترم عائيلهسينه باش ساغليغي وئريب، اونلارا صبير ديلهييريک.
اوستادين تورپاغا تاپشيرما مراسيمي جوما گونو مهر آیینین 24- ینده ساعات ۱۴ دن، مرحومون ائويندن باشلانيب، جنازهسيايسه امامزاده طاهر مزارليغيندا تورپاغا تاپشيريلاجاقدير.
ساهر ادبي انجومنينين ايداره هياتي
23/7/83
======================
عنوان:
کرج - عظيميه (رسالت)- بالاتر از ميدان اسبي- خيابان امير محمود مير زندهدل(عدليه) پلاک ۵۱ - منزل شخصي استاد آلاو
ساعت 14 روز جمعه 24/7/83
گورستان امامزاده طاهر
"تشککور و مینتدارلیق"
حؤرمتلی و عزیز وطنداشلار!
مهر آیینین 17سینده تهرانین بهمن مدنیت ساراییندا، اؤلمز یازیچییمیز، معاصر نثریمیزین آتاسی اوستاد گنجعلی صباحینین 100 ایللیک آغیرلاما مراسیمی چوخ طنطنهلی صورتده قئید اولوندو. شهید آوینی سالونو و اطرافینداکی زاللار آذربایجان ادبییاتینی سئونلرله دولموش و بیر چوخ قوناقلاردا سالوندان کناردا، سارایین حیهطینده توپلاشاراق مراسیمی ایزلهدیلر.
بو اونودولماز آخشامدا، ادبییات و صنعت سئوهر وطنداشلاریمیزلا برابر، آذربایجانین بیر سیرا شهرلریندن گلمیش شاعرلر، یازیچیلار، موسیقی گروهلاری، هابئله دونیا شؤهرتلی آذربایجان علم و مدنیت خادیملریده آغیرلاما مراسیمینه قاتیلمیشدیرلار. مراسیم آذربایجانا لاییق شکلینده قئید اولوندو. مراسیمین آپاریجی هیاتینین ایرهلی سوردویو "ساهر" و "صباحی" ادبی موکافاتلارینین یارانماسی تکلیفی، ایشتراکچیلار و ادبییات و صنعت خادیملری طرفیندن آلقیشلانیب و تصدیقلندی.
آغیرلامانین گئدیشاتی نیظاملی و تمکینلیایدی. بو تمکین بیر چوخ شخصلر، ادبی- مدنی درنکلر، مطبوعات اورگانلاری، بیر سیرا شاعر و یازیچیلاریمیز و اوستاد صباحینین محترم عائیلهسینین امکداشلیغیندان یارانمیشدیر.
اوستاد گنجعلی صباحینین آغیرلاما مراسیمینین آپاریجی هیاتی، بو واسیطهایله مراسیمده ایشتراک ائدهن بوتون وطنداشلاریمیزا، عالیملریمیزه، ادبییات خادیملریمیزه، مراسیمین قورولماسیندا بیزه یاردیمچی اولان موختلیف ایش گروهلارینا، بهمن مدنیت سارایینین ایشچیلری و مودورلرینه و مراسیمین گئدیشاتیندا زحمت چکن گنج دوستلاریمیزا اؤز درین تشککور و مینتدارلیغینی بیلدیریر.
قئید ائتمهلیییک کی، گلن گونلرده آپاریجی هیات طرفیندن مکتوب شکلینده مراسیمین نئجه حاضیرلانماسی، گئدیشاتی و اورادا اوخونان بیانییهلر سیز عزیز وطنداشلاریمیزین ایطلاعسینا چاتاجاقدیر. دیلیمیز و ادبییاتیمیزین گونو گوندن چیچکلنمهسی آرزوسوایله، سیزین یاردیمچی اللرینیزی سیخیریق.
آغیرلاما مراسیمینین آپاریجی هیاتی:
1- خانواده صباحی
2- انجمن ادبی ساهر
3- انجمن ادبی صابر
4- انجمن ادبی نباتی
5- خانه فرزندان آذربایجان
6- فصلنامه آذری
7- ماهنامه خداآفرین
8- هفته نامه بهار زنجان
9- هفتهنامه عصرآزادی تبریز
10- هفتهنامه آراز اردبیل
11- گروه موسیقی ائلدار
12- گروه عاشیقهای تبریز
13- گروه موسیقی تبریز
14- گروه موسیقی آیلار زنجان
15- گروه موسیقی دان اولدوزو
16- گروهی از شعرا و نویسندگان آذربایجان
